Þeir sem ekki reykja fá meira frí


Sífellt fleiri atvinnurekendur í Noregi veita þeim starfsmönnum sínum sem ekki reykja aukafrídaga. mbl.is/Ásdís Ásgeirsdóttir

Sífellt fleiri atvinnurekendur í Noregi veita þeim starfsmönnum sínum sem ekki reykja aukafrídaga. Heilbrigðisráðherra Noregs, Anne-Grete Strøm-Erichsen, segist styðja tiltækið.

"Ráðuneytið styður allar aðgerðir sem stuðla að reyklausum vinnustöðum. Við leggjum áherslu á að vinnuveitendur eru í fullum rétti til að banna notkun tóbaks á vinnutíma," segir Strøm-Erichsen í samtali við vefsíðu norska dagblaðsins Aftenposten.

Starfsmannastjóri fyrirtækisins Infotjenester segir að reykingapásur séu tímafrekar, ekki síst eftir að öll notkun tóbaks var bönnuð innandyra á allflestum vinnustöðum. Þar fá reyklausir starfsmenn tvo aukafrídaga.

Fyrirtækið Grieg Group í Bergen veitir þeim starfsmönnum sínum sem ekki reykja einn frídag umfram þá sem reykja. Talsmaður fyrirtækisins segir það til að vega upp á móti því að þeir sem reykja fari miklu oftar í pásur en þeir reyklausu.