Ég fjárfesti í þessari eðalkerru í gær. Þessi bíll er af gerðinni KIA Sportage og er árgerð 2000.
Vinnustaðakeppninni í Lífshlaupinu lauk í gær ég náði að hreyfa mig eitthvað alla dagana mismikið að vísu en meðaltalið var tæplega 90 mín á dag sem ég er ánægður með og ekki sakar að ég er aðeins léttari eftir þetta. Svo er bara að halda áfram en mikið er ég orðinn þreyttur á þessum helvítis umhleypingum, aldrei sama veðrið tvo tíma í röð.
Í morgun fór ég uppá Geirmundartind, lagði af stað í logni og lenti í  rigningu, blindbyl snjókomu í logni,sólskini  og svarta þoku  og svo þegar ég kom niður var aftur komið logn. Ísland í dag "
Kannski var tímasetningin vitlaus en maður getur greinilega ekki treyst veðurspánni. 

Stóriðjuskólinn gengur vel, hingað til hefur mest verið tölvunám og öryggismál. En það verður í þessum skóla eins og víðar engin próf kennarar munu meta árangur. Þannig að það er undir manni sjálfum komið hvað maður vill leggja á sig, en þetta nýtist allavega allt í framtíðinni þó ekki væri annað en hræra í heilagrautnum í hausnum á mér.
Farið vel með ykkur.

Jæja þá er ég loksins búinn að fjárfesta í broddum ég er búinn að vera að príla í hálkunni uppi á Akrafjalli og nú þorði ég ekki meir. Þetta verður líka kannski til þess að veðurtíðin skáni og ég þurfi ekki að nota þetta.
Annars er lítið að frétta er búinn með 10% af áramótaheitinu svona til að monta mig af því.
Farið vel með ykkur

Þessi mynd er tekin uppá Geirmundartindi annan janúar

Ég hef verið í vandræðum með það að setja inn myndir með blogginu og hef verið að lauma inn gömlum myndum úr albúminu. Svo talaði ég við Jón frá Hrófbergi áðan og hann sagði mér að þetta væri vegna bilunar í kerfinu. Mér er stórlega létt við að frétta það því ég var orðinn stórlega hræddur um það að þetta væri klaufaskapur hjá mér, sem væri skrýtið.
Ég er byrjaður í stóriðjuskólanum hjá Norðurál og það var fyrsti skóladagurinn í gær.
Það gengur vel með áramótaheitið búinn með 5 % af því.


Síðbúin jólamynd

Gleðilegt nýtt ár og takk fyrir það gamla.
Það er svona skrýtið þegar maður eldist þá hugsar maður meira um áramót hvað maður gerði á síðasta ári , hvað maður gerði ekki og hvað maður hefði viljað gera öðruvísi. En þetta er búið og þá fer þetta ár 2011 bara í reynslubankann.
2012  er árið sem við Kristín verðum fimmtug ( 100 ára ) og ég er fullviss um að þetta verði ágætt ár svona í heildina litið. Ég er ekki mikið fyrir áramótaheit alltaf haft það fyrir mig og passað að enginn viti af því svo það sé ekki alltaf verið að minna mig á það. En um áramót hef ég oftast hugsað um það að ég þurfi að létta mig en það er þrautin þyngri og alltof erfitt fyrir mann eins og mig sem hefur endalausa matarlist. Um þessi áramót  strengi ég þess heit að fara 50 sinnum á Háahnjúk og 50 sinnum á Geirmundartind, og svo er bara að sjá til hvernig gengur.
Ég er búinn að hafa það gott um hátíðarnar þrátt fyrir að hafa verið að vinna um jól og áramót. Og er því ekki búinn að heyra mikið í skyldmennunum en það er sjálfum mér að kenna, ég er frekar latur við að rækta frændgarðinn. Duglegri við að labba einn uppá fjöllum en svona er þetta, þetta gefur mér  mikið.




Þessa mynd tók Nonni á berginu þegar við fórum á Lambatind  sennilega toppurinn á árinu í fjallgöngunni hjá mér en það var líka mjög gaman þegar við Kristín fórum á Hvalfell.
 

Frekar síðbúinn jólakveðja en samt gleðileg jól.
Hef verið latur undanfarið sennilega köku og matarátinu um að kenna. Fór samt uppá fjall í gær gott veður en frekar þungt færi og launhált. Þetta var síðasta ferðin þarna upp á árinu var búinn að fara 50 ferðir þarna upp í byrjun maí hætti þá að telja því þá var takmarkinu náð,skrifa aftur fljótlega farið varlega.

Ég er búinn að vera í fríi núna í viku, tók frí tvær síðustu vaktirnar í síðustu törn. Það er skrítið hvað svona frí er fljótt að líða. Ég hef sosum haft nóg að gera en það bíður alltaf eitthvað sem ég á eftir.
Ég er búinn að fara fjórum sinnum uppá fjall í fríinu þó veðrið hefði mátt vera betra til gönguferða. Gangan í gær var mjög erfið og það er ekki að um kenna veðri eða færð heldur var dagsformið hræðilegt. Ég þurfti sí og æ að stoppa til að hvíla mig til að geta haldið áfram, ætli ég hafi ekki verið eins lengi uppá Háahnjúk og ég var í fyrsta skipti þarna upp. Svo í dag gekk mjög vel þó veðrið væri frekar leiðinlegt þarna uppi.
Ég verð að vinna um jól og áramót þannig að þetta er ekki mjög spennandi hátíð framundan fyrir mig, en þetta er það sem ég vinn við þannig að maður verður að sætta sig við þetta.

Það er kominn tími á smá tuð og leiðindi svona að koma þessu frá og snúa sér svo að öðru.
Fréttatímarnir undanfarið hafa verið hálf furðulegir það er verið að rifja upp siðblinduna og siðleysið sem menn í viðskiptum og stjórnmálum viðhöfðu til 2008 og er það hræðilegt að þurfa að hlusta á þetta aftur og aftur. Það er samt nauðsynlegt vegna þess að þetta helvítis skítapakk virðist ætla að sleppa og það er verið að reyna að gera menn eins og Geir að einhverjum píslarvætti. Ég veit ekkert hvort hann telst sekur eða saklaus, en með aðgerðarleysi sínu olli hann þjóðinni gríðarlegu tjóni. Þess vegna fór ég næstum að gráta fullorðinn maðurinn þegar landsfundur sjálfstæðismanna stóð upp og klappaði fyrir honum og Davíð. Eru menn svona siðblindir og er virkilega ekki til fólk til að taka af skarið og hreinsa til í þessu spillingabæli sem Ísland er í dag. Þetta er hræðilegt hvað þarf til að opna augu fjöldans. Það eru einstaka menn sem segja okkur satt og vilja breytingar en þessa menn vantar völd og eftirfylgni til að breyta einhverju.
Í skoðanakönnunum er verið að tala um fylgi flokka á alþingi  og þær segja að flokkur spillingarinnar sé með yfir 40% fylgi og hinir mun minna. Það er gert mikið úr þessu en það er gert minna úr því og kannski ekki minnst á það  að innan við helmingur kjósenda tekur afstöðu í þessum könnunum. Þetta sýnir algjöra vantrú fólks á þessu stjórnmálapakki sem við höfum. Enda er að mínu mati mikið af þingmönnunum bara strengjabrúður sem gera það sem þeim er sagt og eru ekki sjálfum sér samkvæmir frá degi til dags. Sem dæmi segja þingmenn að alþingi sé góður vinnustaður og góður mórall ríki í alþingishúsinu, það getur vel verið. En þannig á það bara ekki að vera menn eiga að fylgja skoðunum sínum fram í rauðann dauðann, nema þeim sé bent á aðra betri þá er í lagi að sættast á hana. Ég skil til dæmis ekki af hverju það er verið að skera niður í heilbrigðisgeiranum og sameina ef stjórnendur og yfirmenn halda sínu en það fólk sem annast sjúklinga og gamalt fólk þarf að bæta við sig vinnu eða jafnvel missa vinnuna. Það er verið að loka deildum og flytja fólk á milli stofnana. Þeir segja að þetta sé hagræðing hvernig getur það verið ég skil það ekki er ekki bara verið að flytja fólk þangað sem er verri þjónusta. Og núna vilja þeir sem annast sjúkraflutninga fá stórauknar fjárveitingar vegna aukins aksturs. Ætli elliheimilin í framtíðinni verði ekki í gámum sem keyrðir verða kringum landið til að gera öll jarðgöngin arðbær. En það er hræðilegt hvernig við látum fara með okkur, og við erum ekki að nýta okkur lýðræðið á réttann hátt.
  Lýðræði er ekki fótbolti þar sem maður heldur með sama liði alla ævi, ef manni líst ekki á formanninn eða liðsmennina í stjórnmálaflokkum á maður ekki að kjósa þá. Bara skila auðu eða velja skásta kostinn.
Er farinn upp á fjall,  vona að ástandið skáni en sennilega er það of seint fyrir marga því miður.

Ég fór í gær að taka við viðurkenningu fyrir liðakeppni í fjallgöngu. Þröstur og ég vorum í liðinu c vakt hjá Norðuráli,  við unnum keppnina með yfirburðum. Og Þröstur varð í þriðja sæti í einstaklingskeppninni. Við áttum ekki von á þessu þegar við skráðum okkur í vor ætluðum bara að vera með og safna smá pening fyrir góðgerðarfélög með þessu. En þetta var frábært og  svo er það bara að fá fleiri með á næsta ári því að þeir sem lentu í öðru sæti ætla að fylkja liði og vinna næst,
ég á nú eftir að sjá það gerast. Þessi mynd er stolin af vef umfí.

Þetta er nú ljóti kuldinn dag eftir dag en það er nú sem betur fer ekki mikill vindur með þessu svo þetta er nú allt í lagi.
Við fórum á tónleika með frostrósum í gærkvöldi,það var mjög gaman og alveg er nú frábært hvað við eigum gott tónlistarfólk. Það sem kom mér mest á óvart hvað það eru rosalega margir sem taka þátt í svona tónleikum. Og þetta var í fyrsta sinn sem ég kem í Hörpuna og það er ótrúleg stærð á öllu þarna og óskandi að þetta geti staðið undir sér.
Ég var að vinna um helgina og á núna eftir tvær næturvaktir og svo kominn í helgarfrí.



Þessi var tekin í síðustu viku svona tæki sést ekki oft á götum Akraness.




Það er nú bara léti og aumingjaskapur að fara ekki í göngu í dag en svona eru sumir dagar bæti það upp um helgina.

Þá er búið að reka Bruce og löngu tímabært. Hann virtist ekki ná að láta liðið spila saman og það var kominn tími á hann. Enda er það leiðinlegt að vera með þokkalegan mannskap og ná ekki stöðugleika í liðið. En svo er spurningin hvaða snillingur tekur við Sunderland gaman væri að fá Roy Keane aftur allavega var liðið skemmtilegra meðan hann var með það.



Þessi mynd var tekin fyrir 10 dögum túnið grænt hjá Haraldi en það er víst kominn vetur núna.



Þetta er hluti af jólaundirbúningnum hjá mér að smakka kökurnar hennar Stínu. Svo fórum við í bæinn í gær og ég kíkti aðeins í boxin hjá Svölu en hún er hörku bakari líka.